«Útkall: Flóttinn frá Heimaey» by Óttar Sveinsson

Spennandi frásögn um einstakan atburð í sögu Íslands. Höfundur les. Í hljóðbókinni er talsvert af samtíma hljóðheimildum, t.d. goshljóðum. Þar sem vitnað er beint í útvarpsþætti í bókinni eru notaðir bútar úr upprunalegu útvarpsþáttunum. Í enda bókarinnar heyrum við svo Ása í Bæ flytja ljóð sitt Heimaslóð við lag Alfreðs Washington Þórðarsonar. Hljóðritun lagsins var einmitt gerð árið 1973.

Aðfaranótt 23. janúar 1973. Jörð skelfur og rifnar upp – um 1,8 km löng gossprunga er að myndast á Heimaey. Eldstrókar rísa með hvellum og drunum. Rúmlega fimm þúsund íbúar eru í hættu. Sumir óttast um afdrif ástvina sinna er þeir líta út um gluggann – telja að gossprungan nái inn í bæinn. Nú ríður á að bjarga fólkinu frá Vestmannaeyjum – og til allrar hamingju liggja Eyjabátar við bryggju. En lokar gossprungan höfninni? Mesti flótti Íslendinga fyrr og síðar er að hefjast. Hér lýsa Vestmannaeyingar nóttinni sem gjörbreytti lífi þeirra.

Hér birtist í fyrsta skipti áhrifarík saga níu manna fjölskyldu í Vestmannaeyjum. Hjónin Sigvaldi Heiðar Árnason og Inga Ingibergsdóttir týna fjórum barna sinna og vita ekkert um þau í tæpa tvo sólarhringa.
Við fylgjumst með örlagaatburðum í febrúar og mars. Vikurstórhríðinni, ógnum hraunstraumsins, hundruðum húsa sem brunnu og hetjulegri baráttu Eyjamanna og annarra björgunarmanna sem lauk með varnarsigri.

Útkallsbækur Óttars Sveinssonar hafa verið í efstu sætum metsölulistanna í hálfan annan áratug og hafa verið gefnar út víða um heim. Lesendur gleyma sér í spennandi frásögn – þar sem höfundurinn og söguhetjurnar sjálfar lýsa sönnum atburðum.